fifi tam

蝙蝠係對翼手目動物嘅統稱，翼手目係哺乳動物中僅次於囓齒目動物嘅第二大種群，而加一共有 19 個科 185 個屬 962 個品種，除咗極地同海洋中一啲島嶼外，分佈遍全世界。翼手目動物嘅四肢同尾之間覆蓋着薄而堅韌嘅皮質膜，可以好似雀仔咁拍翼飛行，呢一點係其他任何哺乳動物都冇嘅，為咗適應飛行生活，翼手目動物進化出一啲其他種群所唔具備嘅特徵，呢啲特徵包括特化伸長嘅指骨同鏈接期間嘅皮質翼膜，前肢拇指同後肢各趾均具爪可以抓住啲嘢，發達嘅胸骨進化出類似雀仔嘅龍骨突，可以畀胸肌多啲位生大啲，同發達嘅聽覺等等。

特徵同習性

夜間活動，通常為群體活動，可達百萬隻，有啲溫帶地區嘅種類響冬季前會有遷徒嘅行為，主要住響洞穴、樹窿、森林裏面，一年繁殖一次，懷胎大約 2 - 6 個月，一次生一胎。

分類

翼手目可以分為兩個亞目：大蝙蝠亞目同小蝙蝠亞目。前者體形較大，多數以水果做嘢食，例如出名嘅狐蝙，翼展開可長達 90 厘米咁大；後者體形遠較前者細隻，多以昆蟲做嘢食。

大蝙蝠亞目嘅種類眼大，主要以花、果實做食物；小蝙蝠亞目體型同眼較大蝙蝠亞目細，以昆蟲、血、小動物、果實、花做食物。

蝙蝠科係小蝙蝠亞目下面嘅一科，約有 300 幾種。

中藥用

夜明砂係中藥嘅一種，原名天鼠屎，生藥係蝙蝠屎，具有清肝熱、散瘀血嘅功效，可治夜盲症。

蝙蝠同雷達

翼手目動物多響夜晚活動，佢哋主要依靠發出超聲波嘅回聲嚟定位，呢種定位機制係發明雷達嘅基礎。

蝙蝠同人類文化

• 由於蝙蝠嘅【蝠】字同福氣嘅【福】字諧音，因此響中華文化度，蝙蝠係幸福、福氣嘅象徵，蝙蝠嘅造型亦經常出現喺好多中華傳統圖案中，例如「五福捧壽」就係五個藝術化嘅蝙蝠造型圍住一個「壽」字圖案。

• 在西方文化中蝙蝠係邪惡嘅象徵，由於佢地醜樣、日頭匿埋、夜晚先出動，所以有人認為蝙蝠係吸血鬼嘅化身，進而有人認為蝙蝠都係以吸血為生嘅邪惡動物，但實際上蝙蝠大多食昆蟲、生果為生，只有極個別嘅物種靠吸血為生。